Նախ՝ ովքեր են ինֆլուենսերները: Դրանք այն մարդիկ են, ովքեր սոցցանցերում գովազդելով ապրանքը կամ ծառայությունը կամ պարզապես դրան աջակցություն հայտնելով, կարող են ազդել հնարավոր գնորդի՝ գնում կատարելու որոշման վրա:

Ահա մի քանի հնարավոր իրավական ծուղակներ, որոնք կարող են ծագել բովանդակության, հեղինակային իրավունքի, ապրանքի նկատմամբ սեփականատիրության և մարքեթինգի մասնագետների կարիքների ու ինֆլուենսերների անկախության միջև հակասության պատճառներով:

Չնայած ինֆլուենսերների շուկան արագ զարգանում է, մի քանի վտանգներ կան, որոնց հետ պետք է հաշվի նստել, այլապես դրանք կվերածվեն իրավական ծուղակների:

Ոչ շատ վաղուց, սոցիալական ինֆլուենսերների բերած հնարավորությունները շատ խոստումնալից էին, սակայն բրենդերը մի փոքր զգուշանում էին անծանոթ մարդուն իրենց բրենդի դեմքը դարձնելուց: Այժմ, մարքեթինգի մասնագետների 50 տոկոսից ավելին համոզված են, որ ինֆլուենսերները իրենց տրամադրության տակ եղած միջոցներից ամենաազդեցիկն են և գերազանցում են իրենց ստեղծած բովանդակության միջոցով ստացվող արդյունքներին: Սակայն ինֆլուենսեր մարքեթինգի միջոցով, նրանք նաև իրենց ենթարկում են որոշակի իրավական վտանգների:

Բրենդի հարաբերությունները ինֆլուենսերների հետ բոլորովին էլ հստակ չեն: Թվում է, թե ընտրեք հետևորդների մեծ քանակ ունեցող ինֆլուենսերին, վճարեք, և թող նա ներկայացնի ձեր բրենդը: Խնդիրը սակայն ավելի բարդ է:

Նախ և առաջ, հաճախորդները, հատկապես երիտասարդ սերունդը, ձգտում են նրան, ինչը իսկական է, բնական է: Մարդկանց 60 տոկոսը հետազոտությունների ժամանակ նշել են, որ հավատում են իրենց ընտրած բլոգերի կարծիքներին, երբ գնում են կատարում: Դա ինֆլուենսերներին դարձնում է բրենդի մասին կարծիք ստեղծելու հզոր գործիք:

Սակայն, այն ինֆլուենսերները, ովքեր բացահայտ չեն նշում, որ իրենց հարաբերությունները իրենց գովազդած բրենդի հետ վճարովի են, իրենց դնում են խոցելի վիճակի մեջ, քանի որ հնարավոր է, հաճախորդները դատական հայց ներկայացնեն անազնիվ գովազդից խաբված լինելու համար: Մինչդեռ, օրինակ Միացյալ Նահանգներում, օրենքը պահանջում է բացահայտ նշել վճարովի հարաբերությունների մասին:

Չնայած և՛ ինֆլուենսերները, և՛ բրենդերը, որոնք վճարում են նրանց, կիսում են պատասխանատվությունը նման դեպքերում, վերջիվերջո բրենդերը ավելի շատ են տուժում: Եվ հետևաբար, ինֆլուենսերների հետ աշխատելիս կարևոր է վերջիններիս աշխատանքը մշտապես վերահսկել:

Ինֆլուենսերները, հատկապես ավելի փորձվածները, այժմ գիտակցում են այսպիսի վտանգների մասին և պատրաստ են ավելի սերտ աշխատել բրենդերի հետ, որպեսզի օրենքի պահանջները չխախտվեն: Շատերի համար դա լրիվ դրույքով աշխատանք է, և նրանք բոլորովին էլ չեն ցանկանում սև ցուցակներում հայտնվել:

Օրինակ, ինչպե՞ս է դա արվում Թվիթերում կամ Ինստագրամում:

Որոշ ինֆլուենսերներ օգտագործում են օրինակ այսպիսի հեշթեգեր՝ #sponsored, #sp կամ #partner, ինչը սակայն լրիվ բացահայտ չի դարձնում գովազդի վճարովի լինելը: Ոմանք էլ այդ հեշթեգերը դնում են պոստի ամենավերջում: Ինստագրամում որոշ քանակի տառերից հետո բովանդակությունը չի երևում, և պետք է սեղմել ՙՙկարդացեք ավելին՚՚ կոճակը, իսկ շատերը այդտեղ կարող են չհասնել: ԱՄՆ-ում, պահանջ է, որ այս հեշթեգերը դրվեն մինչև ՙՙավելին՚՚ կոճակը:

Որոշ սոցցանցեր, հարցը իրենց ձեռքն են վերցրել. Ինստագրամը, օրինակ, սկսած 2017 թ. հունիսից, ավելացրել է ՙՙվճարովի համագործակցություն՚՚ թեգը, որը հայտվում է ինֆլուենսերի հենց անունի կողքը՝ պոստից վերև. սա ակնհայտ է դարձնում բրենդի կողմից վճարված գովազդը նաև նրանց համար, ովքեր սովոր են արագ աչքի անցկացնել պոստերը:

Մարքեթինգի մասնագետների կարծիքով վճարովի բովանդակության բոլոր իրավունքները պատկանում են բրենդին, և այդ կարծիքը լրիվ աբսուրդ չէ: Չէ՞ որ նրանք են հորինում, ստեղծում և վճարում արշավի համար:

Սակայն, մյուս կողմից էլ, ինֆլուենսերները նույնպես ցանկանում են վճարովի բովանդակության նկատմամբ սեփականության իրավունք: Չէ որ դա հենց իրենց զբաղմունքն է, իրենք հենց դրանով են գումար վաստակում: Նրանք իրենց ալիքը ստեղծել են հենց այդ նպատակով:

Ինչպես ցանկացած փորձված մարքեթինգի մասնագետ տեղյակ է, ինֆլուենսերների հետ որոշ ժամանակ աշխատելը կապված է դժվարությունների ու խնդիրների հետ: Բացի վերը նշվածներից, գոյություն ունեն ինֆլուենսերի պահվածքի ու վարվելակերպի հետ առնչվող խնդիրներ, օրինակ, բրենդի ուղերձը ճիշտ չներկայացնելը, սկանդալային պահվածքը, կամ էլ փոքրիկ ՙՙսխալները՚՚, որոնք բրենդի համբավի համար ունենում են մեծ հետևանքներ:

Խորհուրդ է տրվում պայմանագիրը կազմելիս կետ մտցնել, թե բրենդը ինչ ակնկալիքներ ունի կապված ինֆլուենսերի պահվածքի, տեսքի, վերաբերմունքի կամ արտահայտչաձևի նկատմամբ և ինֆլուենսերին հաշվետու դարձնի իր սխալների համար:

Սպորտի ինֆլուենսերների համար, օրինակ, կարելի է նշել, որ նրանք չպետք է փոխեն իրենց քաշը, մազերի ձևը, կամ չպետք է ներքաշվեն հակասական սոցիալական թեմաների մեջ: Սա թերևս մի քիչ խիստ է հնչում, բայց գաղափարն այն է, որ ինֆլուենսերը հաստատուն պահի իր բնույթն ու տոնը ամբողջ արշավի ընթացքում: Սովորաբար, նշվում է, թե ինչպիսի թեմաներից նա պետք է խուսափի՝ ռասայական, վերարտադրողական, կենդանիների վերաբերյալ, քաղաքական, կամ էլ այնպիսի այլ թեմաներից, որոնք ինֆլուենսերին կամ բրենդին կարող են ցույց տալ բացասական լույսի տակ:

Չնայած այս բոլոր ռիսկերին, ինչպես ցույց են տալիս հարցումները, գովազդատուների մեծ մասը պլանավորում են շարունակել օգտագործել ինֆլուենսերներին:

ՇԱՐՈՒՆԱԿԵԼԻ. Ինֆլուենսերների մասին ևս մի քանի իրական պատմություններ ներկայացնում ենք մեր հաջորդ հոդվածներում: