Սոցցանցերը հասանելի են գրեթե բոլորին, սակայն քչերն են լիովին տիրապետում դրանցում բիզնես էջեր վարելու բոլոր նրբություններին:

Շատ մարդիկ, նույնիսկ մարքեթինգի տարիների փորձ ունեցողները, կարծում են, որ Ինստագրամում գեղեցիկ նկարներ տեղադրելը նշանակում է ՙՙսոցցանցերը բիզնեսի համար ճիշտ օգտագործել՚՚, մինչդեռ նկարներ տեղադրելը այսբերգի գագաթն է միայն: Այն ինչ մակերևույթից ներքև է, շատ ավելի բարդ է և շատ ավելի կարևոր է սոցցանցերում հաջող մարքեթինգի համար:

Համացանցը լի է հոդվածներով, որոնք ասում են, թե ինչ է պետք անել սոցցանցերում հաջող մարքեթինգ իրականացնելու համար, սակայն այստեղ մենք ներկայացնելու ենք մի քանի բան, որոնք պետք է դադարեցնել անել, ընդ որում անմիջապես, որպեսզի մնացած բաները ճիշտ հունի մեջ ընկնեն:

Ահա մի քանի վատ սովորություններ, որոնց պետք է վերջ տալ 2019-ին:

Որո՞նք են ՙՙանօգուտ՚՚ ցուցանիշները: Մեկ այլ ձևով դրանք կարելի է կոչել ՙՙդատարկ, ունայն ցուցանիշներ՚՚: Դրանք ձեր լայքերի ու հետևորդների քանակներն են: Բացառապես դրանց վրա կենտրոնանալը շատ չի օգնելու ձեր բիզնեսի աճին:

Սա փաստ է, և հազարավոր ու տասնյակ հազարավոր հետազոտություններ ու հոդվածներ դրա ապացույցն են: Իհարկե այն ժամանակի միջև, որ ձեր հաճախորդները նվիրում են ձեր բրենդին ինտերնետում և այն հավանականության միջև, որ նրանք կգնեն ձեզնից կապ գոյություն ունի: Կապ ունի նաև, թե ինչ ՙՙբարի դրացիական՚՚ զգացումներ ունեն ձեր հաճախորդները ձեր բրենդի նկատմամբ:

Բայց այն ընկերությունները և մարքեթինգի մասնագետները, ովքեր ընդամենը հետևում են, թե քանի հետևորդ ունեն Ինստագրամում, կամ քանի լայք են ստացել Ֆեյսբուքի վիդեոյի համար, հսկայական սխալ են թույլ տալիս:

Ձեր սոցիալական ցանցերի մարքեթինգի հաջողության համար, ձեզ միանշանակ անհրաժեշտ է, բացի ՙՙանօգուտ՚՚ ցուցանիշներից, սկսել չափել նաև այլ ցուցանիշներ:

Իհարկե նվիրված հետևորդների քանակը և նրանց ներգրավվածությունը մեծացնելը ընդհանուր պատկերի մաս են կազմում, սակայն դուք ինքներդ ձեզ ավելի մեծ օգուտ կտաք, եթե սկսեք չափել նաև այնպիսի ցուցանիշներ, ինչպիսիք են օրինակ. քանի անգամ է ցուցադրվել ձեր գովազդը (impressions), քանի մարդ այցելեց ձեր կայքը, որքան ժամանակ նրանք մնացին կայքում, ձեր բիզնեսի համար պիտանի քանի գործողություն կատարվեց (conversions) և քանի մարդ շատ արագ հեռացան կայքից` մտնելուց անմիջապես հետո (bounce rate):

Երբ սկսեք շերտ առ շերտ ուսումնասիրել թվային մարքեթինգի այս բոլոր ցուցանիշները, նոր այդ ժամանակ կտեսնեք, թե սոցցանցերն ինչպես կարող են օգնել ձեր բիզնես նպատակներին:

Երբեմն կարող է պատահել այնպես, որ սոցցանցերով ձեր մարքեթինգի հիմնական նպատակը լինի ձեր բրենդին ճանաչում բերելը, ինչը որ նորմալ է: Այս դեպքում ճիշտ կլինի, եթե դուք նպատակ դնեք ստանալ հնարավորին չափ շատ ցուցադրման քանակներ (impressions) և թիրախավորված լսարանի առավելագույն ներգրավվածություն (engagements):

Այստեղ կարևորն այն է, սակայն, որ խուսափեք սոցցանցերի ձեր մարքեթինգի հաջողության մասին դատել, ելնելով միայն հետևորդների կամ հավանողների քանակից:

Սոցցանցերով մարքեթինգի ամենամեծ բացթողումը հաճախ լինում է պատմություն պատմել չկարողանալը (storytelling): Պատմություն ասելով նկատի չունենք ձեր բրենդի կողմից հյուսված կախարդական հեքիաթ: Պատմություն պատմելը դա ձեր բրենդի կողմից շարունակաբար պատրաստվող փոքրիկ բովանդակալից կտորներ են այն մասին, թե ինչի համար ձեր բրենդը գոյություն ունի և ինչպես է այն անում այն, ինչ անում է: Այդ պատմությունները պետք է լինեն հակիրճ և հեշտ ընկալելի սոցցանցերի այսօրվա լսարանի կողմից, ում ուշադրությունը շատ հեշտ է շեղել:

Ստեղծեք փոքրիկ պատմություններ այն մասին, թե ինչպես եք դուք հիմնել ու աճեցրել ձեր բրենդը: Թող որ դրանցից ամեն մեկը լինի առաձին պատմություն, որպեսզի երբ ընթերցողը դրանցից որևէ մեկը տեսնի, յուրաքանչյուրն առանձին-առանձին իմաստ ունենա: Ցանկության դեպքում էլ նա ավելի մանրամասն պետք է կարողանա այդ նյութերը կարդալ ձեր բլոգում և կայքում:

Այդ բոլոր նյութերը միասին միասին պետք է կազմեն ձեր բրենդի պատմությունը և իրար համահունչ լինեն:

Մեր օրերում սոցցանցերից մենք այնքան շատ տվյալներ ենք ստանում, որ անընդունելի է դրանք չվերլուծելը և չդասակարգելը: Ճիշտ օգտագործելու դեպքում դրանք մեզ համար շատ բան են բացահայտում:

Շատ բրենդեր ուղղակի ամեն օր պոստ են անում և հույս փայփայում, որ դրանք օգուտ կբերեն բիզնեսին, մինչդեռ հարկավոր է մանրամասն ուսումնասիրել հաշվետվություններն ու տեսնել, թե ինչն է աշխատում, ինչը ոչ, և էլ ինչ հնարավորություններ կան: Որպեսզի վերլուծությունը թույլ կամ անօգուտ չլինի, հարկավոր է տվյալներն այնպես կազմակերպել, որ թվերը օգնեն համատեքստը հասկանալուն:

Օրինակ, եթե ձեր պոստի կամ գովազդի ցուցադրման քանակները (impressions) ավելի քիչ են քան անցյալ ամիս, բայց հետևորդների ներգրավվածությունն (engagements) ավելի բարձր է, ի՞նչ է դա նշանակում: Սա կարող է նշանակել, որ սոցիալական հարթակի ալգորիթմները ձեր պոստը չեն հավանել, սակայն մարդկանց այն իսկապես դուր է եկել:

Կամ էլ, եթե Ֆեյսբուքից դեպի ձեր կայք այցելությունների քանակը կտրուկ աճել է, բայց գնում կամ այլ օգտակար գործողություն տեղի չի ունեցել: Սա կարող է նշանակել, որ ձեր կայքի այն էջը ուր այցելուն եկել է՝ ՙՙժամանել է՚՚ (landing page), լավ չի հարմարեցված դիտումների համար կամ էլ տարբեր սարքերի վրա տարբեր ձևով է երևում:

Ավելի լավ տվյալներ հավաքելով, դուք կարող եք առավելագույնը քաղել սոցցաների մարքեթինգից և վստահ լինել, որ ձեր ժամանակը, փողը կամ այլ ռեսուրսներ իզուր չեք վատնում:

Ահա մի քանի տեսակի տվյալներ, որ խորհուրդ է տրվում հավաքել ու վերլուծել.

• Սոցցանցերի ձեր հետևորդների բնութագրերը
• Սոցցանցերի պոստերի կամ գովազդների ցուցադրման քանակները (impressions)
• Սոցցանցերի մասնակիցների ներգրավվածությունը (engagements)
• Սոցցանցերից վեբ կայք այցելությունները (traffic to website)
• Կայքում անցկացրած այցելությունների տևողությունը նրանց համար, ովքեր սոցցանցերից են եկել
• Կայքում դիտած էջերի քանակը նրանց համար, ովքեր սոցցանցերից են եկել
• Կայք մուտք գործելուց հետո` կայքը լքելու արագությունը (bounce rate) նրանց համար, ովքեր սոցցանցերից են եկել
• Ձեր բիզնեսի համար օգտակար գործողությունների քանակը՝ (conversions) նրանց համար, ովքեր սոցցանցերից են եկել:

Այս կարգի վերլուծությունների համար հրաշալի գործիք է Google Analytics-ը, որը անհավանական քանակով տարբեր տեսակի օգտակար տվյալներ է հավաքում ձեր կայքի մասին, այդ թվում նաև սոցցանցերից եկած այցելուների վերաբերյալ:

Շատ բրենդեր մեծագույն սխալ են թույլ տալիս, կարծելով, թե միայն սոցցանցերը կարող են բիզնեսի հաջողության գրավական լինել:

Շատ հաճախ են բրենդերը ստեղծում սոցցանցերի ռազմավարություն առանց բարձրորակ վեբկայք ունենալու, առանց էլփոստերի մարքեթինգի ռազմավարության կամ նույնիսկ առանց որոնման համակարգերում մարքեթինգի ռազմավարության: Երբ սոցցանցերը դաշտում ձեր միակ խաղացողն են, ձեր թիմը մատնված է պարտության:

Երբ փորձենք պատկերացնել, թե առցանց գնում կատարելիս օգտատերերն ինչպես են վարվում և դուք ինքներդ ինչպես եք վարվում, ակնհայտ կդառնա, որ հաճախորդը բազմաթիվ տարբեր ազդակներ է ստանում նախքան գնելու վերջնական որոշում կայացնելը: Եթե վաճառքի ժամանակ հույսներս դնենք միայն սոցցանցերի վրա, ապա կհիմնվենք վաճառքի մի այնպիսի միջոցի վրա, որ վաճառքի ձագարի (purchasing funnel) վերևի մասի վրա է կենտրոնանում միայն՝ այսինքն ապրանքի կամ ծառայության մասին տեղեկացնելու, ծանոթացնելու գործառույթի վրա:

Միայն սոցցանցերով մարքեթինգի դեպքում, մենք միայն այս ծանոթացնելու գործառույթի միջոցով պետք է փորձենք հաճախորդին ստիպել անցնել գնելու ամբողջ ճանապարհը, որը ներառում է մի քանի փուլ, այն է ՙՙճանաչել-հավանել-վստահել՚՚:

Փաստորեն միայն առաջին մասը՝ ՙՙճանաչելը՚՚ օգտագործելով, մենք պետք է գնորդին համոզենք անցնել նաև մնացած փուլերը, մինչև վերջնական որոշում կայացնելը՝ մինչև գնում կատարելու պահը: Այսպիսի բան կարող է պատահել, բայց շատ ավելի հազվադեպ, քան դուք ցանկանում եք:

Մեկ այլ հանգամանք էլ այն է, որ բրենդերը չեն օգտագործում սոցցանցերով մարքեթինգը իրենց մեծ նախաձեռնությունները սատարելու համար: Օրինակ, եթե ձեր ընկերությունը ստեղծել է հրաշալի բովանդակությամբ նյութ, որը հաճախորդները կարող են ներբեռնել իրենց համակարգչի մեջ, ապա բրենդը պետք է անի հետևյալը. ստեղծի բլոգ պոստ, որը պատմում է այդ նյութի մասին, նախաձեռնի մարքեթինգային արշավներ, որոնք հոսք կբերեն դեպի ձեր կայք, իրականացնի էլփոստով մարքեթինգ, որը դարձյալ հոսք կբերի դեպի ձեր կայք, հրատարակի վճարովի կամ օրգանական պոստեր սոցցանցերում, որոնք կպատմեն այդ հրաշալի նյութի մասին և վերաթիրախավորի (retarget) այն մարդկանց հոսքերը, ովքեր այցելել են այդ հրաշալի նյութի էջը, բայց գնորդ չեն դարձել:

Այսպիսի միասնական, բոլոր թվային միջոցների փոխհամաձայնեցված մոտեցումը շատ ավելի մեծ արդյունք է բերում, քան սոցցանցերում պոստեր լցնելն ու հուսալը, որ ամեն ինչ լավ կլինի:

Սոցցանցերում գովազդը հզոր գործիք է: Եթե համեմատենք այլ միջոցների հետ, դժվար թե գտնենք հաճախորդներին թիրախավորելու ավելի արդյունավետ առցանց միջոց:

Ունենալով մարդկանց հետաքրքրությունների և վարվելակերպի մասին համապարփակ տեղեկություններ, տվյալների բազայի կառավարման միջոցներ (CRM) և ձեր լսարանի պարամետրերի նման պարամետրերով նոր լսարաններ (lookalike audiences) գտնելու հնարավորություններ , սոցցանցերով գովազդը կարող է այս կամ այն ձևով թիրախավորել հաճախորդների ցանկացած խումբ: Սակայն, դժբախտաբար, շատ ընկերություններ, դանդաղ են որդեգրում սոցցանցերով գովազդի այս հրաշալի միջոցները:

Միչդեռ սոցցանցերի՝ մարդկանց ու ընկերություններին միմյանց հանդիպեցնելու ՙՙմարդասիրական մտադրությունները՚՚ այլևս գոյություն չունեն: Էլ իրատեսական չի մտածել, թե որևէ ընկերության կհաջողվի անցնել մրցակիցների և այլ շեղող հանգամանքների աղմուկի միջով և հասնել հնարավոր հաճախորդին միայն օրգանական պոստերի միջոցով: Գրեթե բոլոր սոցցանցերը արդեն սահմանափակել են օրգանական հասանելիությունը, որի պատճառով ընկերությունները սկսել են կորուստներ կրել:

Բացի դրանից, ընկերությունների մեծ մասը չգիտեն, թե ինչպես է պետք չափել իրենց ներդրած գումարի դիմաց ստացվող եկամուտը (ROI), երբ հարցը վերաբերում է սոցցանցերին: Ինչպես արդեն նշել ենք, սոցցանցերը ավելի արդյունավետ են գնման ձագարի (purchasing funnel) վերևի մասում, այսինքն պոտենցյալ գնորդին ապրանքի կամ ծառայության հետ ծանոթացնելու հարցում:

Սոցցանցերը կարող են նպաստել վաճառքներին, սակայն հաճախորդների մեծ մասը մինչև գնում կատարելը շատ անգամներ մի սարքից մյուսին և մի հարթակից մյուսին են անցնում ըստ հանգամանքների, և նրանց հետևելու հնարավորությունը կորում է: Շատ գնումներ, որոնք տեղի են ունեցել սոցցանցերի շնորհիվ, որպես այդպիսին չեն ճանաչվում: Իհարկե, կան եղանակներ այդ ամենը ճիշտ հաշվելու համար, սակայն ընկերությունների մեծ մասը տեղյակ չէ դրանց մասին: Այդ պատճառով էլ նրանք ուղղակի նայում են վաճառքներին ու հիասթափություն ապրում, որ սոցցանցերը այն ծավալներով չեն վաճառք իրականացնում, ինչ իրենք սպասում էին:

Սրա պատճառով, շատերը դադարեցնում են սոցցանցերով գովազդը: Սակայն, անկախ նպատակներից, սոցցանցերը որպես գովազդային հարթակ շատ արդյունավետ են:

Հենց որ վերջ տաք այս վատ սովորություններին, կսկսեք ցուցանիշների բարելավում նկատել, և ձեր սոցցանցերի հաջողությունները կբազմապատկվեն: